PEKINO -- Pli ol 142.80 milionoj da dozoj de COVID-19-vakcinoj estis administritaj tra Ĉinio ĝis lundo, diris la Nacia Komisiono pri Sano marde.
Ĉinio administris 102.4 milionojn da dozoj de COVID-19-vakcino ĝis la 27-a de marto, diris la Ĉina Nacia San-Komisiono dimanĉe.
La tutmonda provizo de du COVID-19-vakcinoj evoluigitaj de filioj de la ĉina Sinopharm superis 100 milionojn, anoncis unu filio vendrede. Kvindek landoj kaj regionoj aprobis la vakcinojn de Sinopharm por komerca aŭ kriza uzo, kaj pli ol 80 milionoj da dozoj de la du vakcinoj estis administritaj al homoj el pli ol 190 landoj.
Ĉinio plifortigis sian vakcinadplanon por konstrui pli vastan imunŝildon, diris Wu Liangyou, vicdirektoro de la malsankontrola oficejo de la NHC. La plano fokusiĝas al ŝlosilaj grupoj, inkluzive de homoj, kiuj loĝas en grandaj aŭ mezgrandaj urboj, havenurboj aŭ landlimaj regionoj, dungitoj de ŝtataj entreprenoj, universitataj studentoj kaj prelegantoj, kaj dungitoj de superbazaroj. Homoj pli ol 60-jaraj aŭ kun kronikaj malsanoj ankaŭ povas ricevi la vakcinon por esti protektitaj kontraŭ la viruso.
Laŭ Wu, 6.12 milionoj da vakcinaj dozoj estis administritaj vendrede.
La dua dozo devas esti administrita tri ĝis ok semajnojn post la unua injekto, konsilis Wang Huaqing, ĉefa fakulo pri la imuniga plano ĉe la Ĉina Centro por Malsankontrolo kaj Preventado, dum la dimanĉa gazetara informkunveno.
Oni konsilas, ke homoj ricevu du dozojn de la sama vakcino, diris Wang, aldonante, ke ĉiu, kiu rajtas je vakcinado, ricevu la injektojn kiel eble plej baldaŭ por konstrui gregan imunecon.
La du vakcinoj de Sinopharm pruviĝis efikaj kontraŭ pli ol 10 variaĵoj trovitaj en Britio, Sud-Afriko kaj aliaj regionoj, diris Zhang Yuntao, vicprezidanto de China National Biotec Group, kiu estas aligita al Sinopharm.
Pliaj testoj estas farataj koncerne variaĵojn trovitajn en Brazilo kaj Zimbabvo, diris Zhang. Datumoj de klinikaj esploroj pri infanoj en aĝo de 3 ĝis 17 jaroj plenumis atendojn, sugestante ke la grupo povus esti inkludita en la vakcinadplano en la proksima estonteco, aldonis Zhang.
Afiŝtempo: 6-a de aprilo 2021
